ଇ-ମେଲ ନିଉଜଲେଟର ପ୍ରକାଶନ

ବୈଷୟିକ ପ୍ରଗତି ସାମାଜିକ ଆଙ୍ଗୀକରେ ନୂତନ ସଂଭାବନାମାନ ନେଇ ପହଞ୍ଚିଥାଏ l ସାମାଜିକ ଗଣମାଧ୍ୟମ ବା ସୋସିଆଲ ମିଡ଼ିଆ ମଞ୍ଚରେ ବ୍ଳଗ, ଫେସବୁକ, ଟୁଇଟର ଭଳି ଉତ୍ପାଦ ପରକୁ ଇ-ମେଲ ନିଉଜଲେଟର ତଥ୍ୟ ବିନିମୟ କ୍ଷେତ୍ରରେ ବିପୁଳ ପ୍ରତିଶୃତି ସହ ଅବତୀର୍ଣ୍ଣ ହୋଇଛି l ଏହା ମୁଖ୍ୟତଃ ବ୍ୟାବସାୟିକ ଉନ୍ନୟନ ବା ବିଜିନେସ ପ୍ରମୋସନ କ୍ଷେତ୍ରରେ ବ୍ୟବହୃତ ହେଉଥିଲେ ହେଁ ବୌଦ୍ଧିକ ଯୋଗାଯୋଗ ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ l

ନିଉଜଲେଟର ସାମ୍ୱାଦିକତାର ଅନ୍ୟତମ ପୁରାତନ ବିଭବ l ମୁଦ୍ରଣ ଯନ୍ତ୍ର ଉଦ୍ଭାବନ ପୂର୍ବରୁ ବ୍ୟବସାୟ ଓ ରାଜକାର୍ଯ୍ୟରେ ହାତଲେଖା ପତ୍ରିକା ବ୍ୟବହୃତ ହେଉଥିଲା l ଗୋଟିଏ ବ୍ୟାବସାୟିକ ପେଣ୍ଠରେ ବିଭିନ୍ନ ଦ୍ରବ୍ୟର ଦର ତାଲିକା ଅନ୍ୟ ବ୍ୟାବସାୟିକ ପେଣ୍ଠର ବ୍ୟବସାୟୀଙ୍କୁ ହାତଲେଖା ପତ୍ରିକା ପତ୍ରବାହକଙ୍କ ମାଧ୍ୟମରେ ପ୍ରେରଣ କରାଯାଉଥିଲା l

ସେହିପରି ରାଜ୍ୟର ବିଭିନ୍ନ ପ୍ରାନ୍ତରୁ ପ୍ରଶାସନିକ ବିବରଣୀ ରାଜାଙ୍କ ନିକଟରେ ପହଞ୍ଚୁଥିଲା l ଆମ ଦେଶରେ ମୋଗଲ ସମ୍ରାଟ ଔରଙ୍ଗଜେବ ନିଜ ଶାସନକାଳରେ ସାମ୍ରାଜ୍ୟର କୋଣ ଅନୁକୋଣରେ ହାତଲେଖା ପତ୍ରିକା ଲେଖକ ଏବଂ ଅଶ୍ୱାରୋହୀ ପତ୍ରବାହକମାନଙ୍କୁ ନିଯୁକ୍ତି ଦେଇଥିଲେ l

ଓଡ଼ିଶାରେ ଇଂଲିଶ ପ୍ରଶାସକମାନେ ପହଞ୍ଚିବାପୂର୍ବରୁ ଅଧୁନା ଚୌଦ୍ୱାରଠାରେ ସ୍ଥାପିତ କୁଜୀବର ମଠରୁ ସାଧୁସୁନ୍ଦର ଦାସ ଭୁର୍ଜପତ୍ର ଓ ହରିତାଳ କାଗଜରେ ହାତଲେଖା ‘କୁଜୀବର ପତ୍ର’ ପ୍ରକାଶ କରୁଥିବା ପ୍ରମାଣ ମିଳେ l

୧୯୯୫ ମସିହା ବେଳକୁ ପାଶ୍ଚାତ୍ୟ ଭୂଖଣ୍ଡ, ମୁଖ୍ୟତଃ ଯୁକ୍ତରାଷ୍ଟ୍ର ଆମେରିକାରେ ଇ-ମେଲ ବ୍ୟବହାର ଲୋକପ୍ରିୟ ହେବା ପୂର୍ବରୁ ବିଭିନ୍ନ ବିଷୟରେ ମୁଦ୍ରିତ ନିଉଜଲେଟର ଦୀର୍ଘ କାଳଧରି ପ୍ରଚଳିତ ଥିଲା ଏବଂ ଅନେକ କ୍ଷେତ୍ରରେ ଏହା ଅର୍ଥ ଉପାର୍ଜନ ବା ମନିଟାଇଜେସନରେ ପର୍ଯ୍ୟବେସିତ ହୋଇପାରୁଥିଲା l ଅବଶ୍ୟ ଆମଦେଶରେ ବୃହତ ବ୍ୟାବସାୟିକ ସଂଗଠନଗୁଡ଼ିକ ଦ୍ୱାରା ନିଉଜଲେଟର କେବଳ ଲୋକସଂପର୍କ ପତ୍ର ବା ପବ୍ଳିକ ରିଲେସନ ଟୁଲ ଭାବେ ସୀମାବଦ୍ଧ ଥିଲା l

୨୦୧୦ ମସିହାରେ ଫିଲ କାପଲାନଙ୍କ ଦ୍ୱାରା ବିକଶିତ ‘ଟାଇନିଲେଟର’ ସାଧାରଣକ୍ଷେତ୍ରରେ ଇ-ମେଲ ନିଉଜଲେଟର ବ୍ୟବହାର ଲାଗି ପ୍ରଶସ୍ତକ୍ଷେତ୍ର ଉନ୍ମୁକ୍ତ କରିଥିଲା l ଏହାକୁ ୨୦୧୩ ମସିହାରେ ଯୁକ୍ତରାଷ୍ଟ୍ର ଆମେରିକାର ପ୍ରମୁଖ ବ୍ୟାବସାୟିକ ନିଉଜଲେଟର ବିତରକ ‘ମେଲଚିମ୍ପ’ ଅଧିଗ୍ରହଣ କରିଥିଲେ l ତେବେ ପୂର୍ବବତ ‘ଟାଇନିଲେଟର’କୁ ବିଶ୍ୱବ୍ୟାପୀ ନିଃଶୁଳ୍କ ସେବା ଅବ୍ୟାହତ ରଖିଛନ୍ତି l ଏହି ମଞ୍ଚରେ ପ୍ରକାଶିତ ସମ୍ୱାଦସାରଭିତ୍ତିକ ‘ସ୍କିମ’ ନିଉଜଲେଟରର ୧୫ ଲକ୍ଷ ଗ୍ରାହକ ଥିବାବେଳେ ‘ଷ୍ଟ୍ରାଟଚ଼େରି’ ନିଉଜଲେଟରର ବାର୍ଷିକ ଗ୍ରାହକ ଚ଼ାନ୍ଦା ପ୍ରାୟ ସାତ ହଜାର ଟଙ୍କା ନିର୍ଦ୍ଧାରିତ ହୋଇଥାଏ l

ଅଗ୍ରଣୀ ଓଡ଼ିଆ ସାମ୍ୱାଦିକ ମଣ୍ଡଳୀ ବିକାଶରେ ଇ-ମେଲ ନିଉଜଲେଟର ମଞ୍ଚ ବ୍ୟବହୃତ ହୋଇପାରିବ l ଏକ ପକ୍ଷରେ ଓଡ଼ିଆ ସାମ୍ୱାଦିକତା ବିକାଶରେ ଆଗ୍ରହୀ ବ୍ୟକ୍ତିବିଶେଷ ଏହି ଇ-ମେଲ ନିଉଜଲେଟର ସବସ୍କ୍ରାଇବ କରିବା ସହ ନିଜେ ମଧ୍ୟ ଇ-ମେଲ ନିଉଜଲେଟର ପ୍ରକାଶ କରି ବିତରଣର ବ୍ୟବସ୍ଥା କରିପାରିବେ l ଫଳତଃ ଏକ ନିର୍ଦ୍ଧିଷ୍ଟ ଚ଼ିନ୍ତାଧାରାରେ ବିଶ୍ୱାସ ରଖୁଥିବା ଗୋଷ୍ଠୀ ମଧ୍ୟରେ ଭାବ ଆଦାନ ପ୍ରଦାନ ସଂଭବପର ହୋଇପାରିବ l କିଛି ସାମ୍ୱାଦିକ ପାଠକ ଓ ପ୍ରକାଶକ ତଥା ଅନ୍ୟ କିଛି ସାମ୍ୱାଦିକ କେବଳ ପାଠକ ପର୍ଯ୍ୟାୟଭୁକ୍ତ ହୋଇ ଓଡ଼ିଆ ସାମ୍ୱାଦିକତାରେ ଗୁଣବତ୍ତା ବିକାଶରେ ସଂପୃକ୍ତ ରହିପାରିବେ l  

ଇ-ମେଲ ନିଉଜଲେଟର ଉପଯୋଗରେ କେତେକ ପ୍ରତିବନ୍ଧକ ମଧ୍ୟ ଚ଼ିହ୍ନଟ କରାଯାଇପାରେ l ପ୍ରଥମତଃ ଇ-ମେଲ ନିୟମିତ ବ୍ୟବହାରରେ ଅନଭ୍ୟସ୍ତ ସାମ୍ୱାଦିକମାନେ ଏଭଳି ପ୍ରଚ଼େଷ୍ଟାରେ ଉପକୃତ ନହୋଇପାରନ୍ତି l ଦ୍ୱିତୀୟତଃ ଏହି ରକମର ମାସମେଲ ଅନେକ ସମୟରେ କେତେକ ଇ-ମେଲ ମଞ୍ଚରେ ସ୍ପାମଭାବେ ପହଞ୍ଚୁଥିବା ହେତୁ ଗ୍ରହୀତା ଏହାକୁ ଖୋଜି ବାହାର କରିନପାରିଲେ ପାଠକରିବା ସୁଯୋଗ ନମିଳିପାରେ l ତୃତୀୟତଃ ଚର୍ଚ୍ଚିତ ଇ-ମେଲ ନିଉଜଲେଟର ପ୍ରକାଶନ ସଂପର୍କରେ ରାଜ୍ୟର ସଂଖ୍ୟାଧିକ ସାମ୍ୱାଦିକଙ୍କୁ ଅବଗତ କରାଇବା ତଥା ସେମାନେ ସବସ୍କ୍ରାଇବ କରିବା କଳାକୌଶଳ ଅକ୍ତିଆର କରିବା ହୁଏତ ତୁରନ୍ତ ଫଳପ୍ରଦ ନ ହୋଇପାରେ l

ତେବେ ଓଡ଼ିଆ ସାମ୍ୱାଦିକତା ଡ଼ିଜିଟାଲାଇଜେସନ ଆଡ଼କୁ ମୁହାଁଉଥିବା ହେତୁ ସମସ୍ତ ସାମ୍ୱାଦିକ ଏହି ଧାରାରେ ଅଭ୍ୟସ୍ତ ହେବା ନିମନ୍ତେ ପରିବେଶ ସୃଷ୍ଟିକରିବା ଜରୁରୀ ଆବଶ୍ୟକତାରେ ପରିଣତ ହୋଇଛି ଏବଂ ଏ ଦିଗରେ ସମସ୍ତଙ୍କଠାରେ ଆଗ୍ରହ ଓ ଦକ୍ଷତା ଆଶା କରିବା ଅସମଚୀନ ମନେ ହୁଏନା l

ଇ-ମେଲ ନିଉଜଲେଟର ଉପଯୋଗରେ କେତେକ ସୁବିଧାସୁଯୋଗ ଉପଲବ୍ଧ l ପ୍ରଥମତଃ ‘ଟାଇନିଲେଟର’ ମଞ୍ଚରେ ଏହା ଏକ ନିଃଶୁଳ୍କ ସେବା l ଅର୍ଥାତ ଯେ କୌଣସି ବ୍ୟକ୍ତି ସ୍ୱାଧୀନଭାବେ ଆଗ୍ରହ ମତେ ଅନ୍ୟ କୌଣସି ବ୍ୟକ୍ତି ବା ସଂଗଠନ ଦ୍ୱାରା ପ୍ରକାଶିତ ଇ-ମେଲ ନିଉଜଲେଟର ସବସ୍କ୍ରାଇବ କରି ନିୟମିତ ଭାବେ ନିଜ ଇ-ମେଲ ଏକାଉଣ୍ଟରେ ପାଇପାରିବେ କିମ୍ୱା ଅନସବସ୍କ୍ରାଇବ କରି ବିତରଣ ତାଲିକା ବା ସବସ୍କ୍ରାଇବର ଲିଷ୍ଟରୁ ବାଦ ହୋଇପାରିବେ l

ଦ୍ୱିତୀୟତଃ ଭୌଗଳିକ ସୀମାପାର ସମବିଚ଼ାରଧାରାର ବ୍ୟକ୍ତିବିଶେଷଙ୍କ ସହ ସମକାଳରେ ଏହି ମାଧ୍ୟମରେ ଯୋଗାଯୋଗ ସଂଭବପର l ତଥ୍ୟ ବିତରଣପରେ ଗ୍ରହୀତାଗଣ ନିଜନିଜ ପ୍ରତିକ୍ରିୟା ମୂଳସୂତ୍ରକୁ ପ୍ରେରଣକରିବାର ସୁବିଧା ରହିଛି l ଫଳତଃ ଯୋଗାଯୋଗ ପରିଧି ବା କମ୍ୟୁନିକେସନ ସର୍କଲରେ ପୂର୍ଣ୍ଣତା ଚ଼ରିତାର୍ଥ ହୋଇଥାଏ l

ତୃତୀୟତଃ ଇ-ମେଲ ନିଉଜଲେଟର ରଚ଼ନାର ଆକାର କିମ୍ୱା ଗ୍ରହୀତାଙ୍କ ସଂଖ୍ୟାରେ କୌଣସି ସୀମାନିର୍ଦ୍ଧାରିତ ନହୋଇଥିବାହେତୁ ଯୋଗାଯୋଗ ପ୍ରଯୋଜନାରେ ପର୍ଯ୍ୟାପ୍ତ ସ୍ୱାଧୀନତା ଉପଭୋଗ କରିହୁଏ l

ସର୍ଜନଶୀଳ ସାଂବାଦିକମାନେ ଓଡ଼ିଆ ସାଂବାଦିକତାର ଗୁଣବତ୍ତା ବିକାଶ ଉଦ୍ୟମରେ ପ୍ରତ୍ୟେକେ ‘ଟାଇନିଲେଟର’ ମାଧ୍ୟମରେ ଏକ ଏକ ଇ-ମେଲ ନିଉସଲେଟର ପ୍ରଯୋଜନା କରିପାରିବେ l ବ୍ଳଗ ଓ ଫେସବୁକ ଭଳି ଏହା ଏକ ସଂପୂର୍ଣ୍ଣ ଶୁଳ୍କବିହୀନ ମଞ୍ଚ ଏବଂ ଅନ୍ୟାନ୍ୟ ସୋସିଆଲ ମିଡ଼ିଆ ବ୍ୟବହାର ଭଳି ବିଶେଷ ବୈଷୟିକ ଜ୍ଞାନ ଆବଶ୍ୟକ କରେନାହିଁ l ସୃଜନରେ ରୁଚ଼ି ରଖୁଥିବା କିଛି ସାଂବାଦିକଙ୍କୁ ନିଜନିଜ ନିଉଜଲେଟର ସବସ୍କ୍ରାଇବରରୂପେ ଚ଼ିହ୍ନଟ କରିବା ନିମନ୍ତେ ଯତ୍ନବାନ ହୋଇପାରିବେ l

ପ୍ରଥମତଃ ସେମାନେ ଇଣ୍ଟନେଟରେ ଗଣମାଧ୍ୟମ ସଂପର୍କୀତ ଯାହାସବୁ ଭଲ ରଚ଼ନା ପଢୁଛନ୍ତି ଏବଂ ଭାବୁଛନ୍ତି ଯେ ତାହା ଅନ୍ୟମାନେ ପଢ଼ିବା ଉଚିତ, ତାହା ସଂପର୍କରେ ସାମାନ୍ୟ ସୂଚ଼ନା ଦେଇ ନିଜ ନିଉଜଲେଟରରେ ଲିଙ୍କ୍ ଉଲ୍ଲେଖ କରିବେ l ଏହାଫଳରେ ଆଉ କିଛି ଓଡ଼ିଆ ସାଂବାଦିକ ନୂଆ କଥାଟିଏ ଜାଣିପାରିବେ l

ଦ୍ୱିତୀୟତଃ ସେମାନେ ନିର୍ଦ୍ଧିଷ୍ଟ ସମୟ ଅବଧିରେ ନିଜେ ଲେଖିଥିବା ବା ପ୍ରଯୋଜନା କରିଥିବା ଲେଖା ବା କାର୍ଯ୍ୟକ୍ରମର ପ୍ରତିଲିପି କିମ୍ୱା ତାହାର ଲିଙ୍କ ନିଜ ନିଉଜଲେଟରରେ ପ୍ରକାଶ କରିପାରିବେ l ଆବଶ୍ୟକ ସ୍ଥଳେ ସେଭଳି କୃତୀ ପାଇଁ ତଥ୍ୟ ସଂଗ୍ରହ, ଶୈଳୀ ନିରୂପଣ ଓ ପ୍ରଯୋଜନା ଅଭିଜ୍ଞତା ସଂପର୍କରେ ମଧ୍ୟ ଉଲ୍ଲେଖ କରିପାରନ୍ତି l ଏହାଦ୍ୱାରା ଅନ୍ୟ କିଛି ଓଡ଼ିଆ ସାଂବାଦିକ କେତେକ ସଫଳ ରଚ଼ନା ଓ ତାହା ପ୍ରସ୍ତୁତିର ପୃଷ୍ଠଭୂମି ସଂପର୍କରେ ଅବଗତ ହୋଇପାରିବେ l

ତୃତୀୟତଃ ସେମାନେ ପ୍ରତି ମାସରେ ଥରେ ଓଡ଼ିଆ ଗଣମାଧ୍ୟମରେ ପ୍ରକାଶିତ ଏକ ରଚ଼ନା ବା ପ୍ରଯୋଜନାର ଗୁଣାତ୍ମକ ସମୀକ୍ଷା ବା କ୍ରିଏଟିଉଭ ଏପ୍ରିସିଏସନ ନିଜନିଜ ନିଉଜଲେଟରରେ ପ୍ରକାଶ କରିପାରିବେ l ଏହାଫଳରେ ଓଡ଼ିଆ ଗଣମାଧ୍ୟମରେ ପ୍ରକାଶିତ ରଚ଼ନାଗୁଡ଼ିକର ତୁଳନାତ୍ମକ ସମୀକ୍ଷାର ବାଟ ଖୋଲିବ ଓ ସାଂବାଦିକମାନେ ନିଜ ସୃଷ୍ଟି ସଂପର୍କରେ ଗୁଣାତ୍ମକ ଦିଗରୁ ସଚ଼େତନ ହେବା ଅବକାଶ ସୃଷ୍ଟି ହୋଇପାରିବ l

ଇ-ମେଲ ନିଉଜଲେଟର ଗୁଡ଼ିକ ପାକ୍ଷିକ କିମ୍ୱା ସାମୟିକ ହେବା ଉଚ଼ିତ l ବୃତ୍ତିଧାରୀ ସାଂବାଦିକମାନଙ୍କ ନିମନ୍ତେ ଏହାର ରଚ଼ନା ଓ ପ୍ରଯୋଜନା ଅଧିକ କାର୍ଯ୍ୟଭାର ସୃଷ୍ଟି କରୁଥିବା ହେତୁ କମ ସମୟ ଅବଧିରେ ପ୍ରକାଶନ ସଂଭବପର ନ ହୋଇପାରେ l ପୁଣି ନିଉଜଲେଟରର ପାଠ୍ୟ ଉଚ୍ଚମାନର ନ ହେଲେ ପାଠକୀୟ ଆଦୃତି ହରାଇବସିବା ତଥା ତୁରନ୍ତ ଜଙ୍କମେଲ ବା ଅନସବସ୍କ୍ରାଇବ ପର୍ଯ୍ୟାୟକୁ ଖସିଯିବା ଅଭିଜ୍ଞତା ଅରୁଚ଼ିକର ବୋଧ ହୋଇପାରେ l

ଏଭଳି ଏକ କାର୍ଯ୍ୟଧାରା ବା ରୋଡ଼ମ୍ୟାପକୁ ସାଧ୍ୟମତେ ବ୍ୟବହାରଯୋଗ୍ୟ କରିବା ସଂପୃକ୍ତ ବ୍ୟକ୍ତିବିଶେଷଙ୍କ କର୍ତ୍ତୃତ୍ୱାଧୀନ l ତେବେ ନିଜ ଅଧ୍ୟୟନର ସାରକଥା ବିତରଣ, ନିଜ ରଚ଼ନା ସଂପର୍କରେ ଅନ୍ୟକୁ ଅବଗତ କରାଇବା ତଥା ଅପର ବ୍ୟକ୍ତିବିଶେଷଙ୍କ ପ୍ରକାଶନର ସମୀକ୍ଷାରେ ଭାଗିଦାରୀ ସାମୂହିକସ୍ତରରେ ସାଂବାଦିକତାର ଗୁଣବତ୍ତା ବିକାଶ ଦିଗରେ ଯେ ସହାୟକ ହେବ ଏଥିରେ ସନ୍ଦେହ ନାହିଁ l

ମନେରଖିବାକୁ ହେବ ଏହା ଏକ ପ୍ରସ୍ତାବିତ କାର୍ଯ୍ୟଧାରା ଏବଂ ଏପରି ଅନେକ କାର୍ଯ୍ୟଧାରା ପରିକଳ୍ପନା କରାଯାଇପାରେ l ତେବେ ଆଲୋଚ଼୍ୟ କାର୍ଯ୍ୟଧାରା ଉପଯୋଗ ଜଣେ ସର୍ଜନଶୀଳ ସାଂବାଦିକକୁ ଏକ ପରୀକ୍ଷିତ ଆଗ୍ରହୀ ପାଠକ ମଣ୍ଡଳୀସହ ଭାବବିନିମୟ ନିମନ୍ତେ ବିନା ଆର୍ଥିକ ପ୍ରତିବନ୍ଧକରେ ମଞ୍ଚଟିଏ ଗଢ଼ିତୋଳିବାରେ ସହାୟକ ହୋଇପାରିବ l ପୁନଶ୍ଚ ଏହି କାର୍ଯ୍ୟଧାରା ସମସ୍ତଙ୍କ ନିମନ୍ତେ ଉଦ୍ଧିଷ୍ଟ ନୁହେ, କିଛି ସଂଖ୍ୟକ ସର୍ଜନଶୀଳ ସାଂବାଦିକ ଏଥିରେ ଅଭ୍ୟସ୍ତ ହୋଇପାରିଲେ ଓଡ଼ିଆ ସାଂବାଦିକତାର ସାମାନ୍ୟ ଗୁଣବତ୍ତା ବିକାଶ ସଂଭବପର ହୋଇପାରିବ ବୋଲି ଆଶା କରାଯାଇପାରେ l 
***